7.6.10

Blur

Duo tigo monjak ni ese masih blur nak menjalankan tanggungjawab selaku Pengurus Pemasaran ( title yo lobih tu..habuk tarak ). Nak mulokan semula apo yang ese dah tinggalkan onam purnamo yang lalu, bulih memang la bulih tapi sonak jugak kepalo ese nak nyusun jadual balik nak mulo dari mano aih nih.

Berbalik pado kerjayo. Sampai ke tuo memang la kono kojo. Kalu tak kojo camno nak makan, nak ado tompek tinggal yang seleso, apotah laie nak kawin kor. Kono la carik jugak duit tapi yang malangnyo tak nyompek aih nak nyimpan, memang selalunyo abih terus buek bayar apo yang patut nak menampung idup di bandarayo nih.

Bilo konangkan dan pikir semula, ghaso macam lobih seleso yo duduk dokek kampong tu. Buek yo apo yang patut kek kampong. Dapek sikit kito idup pun dah cukup seleso, kalu dapeknyo banyak, memang murah rejki orang tuo kato. Nak pulak hiburan pun takdo, pasarayo bosar-bosar pun takdo nak poie shoping. Jadi pendapatan bulanan ataupun hasil kojo ponat lolah tak lah di laburkan ke tompek tak sepatutnyo atau membazir buek boli bondo yang tak pekdah.

Tapi bilo konang balik, kalu duduk pulak dokek kampong tu ah. Tak berkombang otak ni ah. Potang-potang tengok dok melepak yo kodai kopi. Dok borak kosong isu negaro. Isu politik dan paling jahilnyo dok ngumpat sano sini. Parah aih.

Walau apo pun, ado pro and kontra lah duduk dokek mano, kojo dokek mano, carik rejki dokek mano sekalipun. Yang ponting niat biar ikhlas. Lopeh tuh perjalanan idup tuh kono lah susun biar mengikut landasan yang dituntut oleh agama. Selagi menyasar jauh lari dari landasan, idup dokek mano-mano pun samo yo. Takdo makno dan ghaso serbo tak longkap yo.




Related Posts with Thumbnails