1001 MaLaM

Dio ponah nangis kerano ese. Katonyo ese pentingkan kawan-kawan daripado dio. Lalu dio terkilan dan sedih lantas menangis. Bilo ese dapat tau, ese ghaso bersalah pado dio.

Bukan gitu, ese bukan pentingkan kawan-kawan dari dio. Kalu dio anggap gitu, nampaknyo dio sudah salah tafsir. Takkan dio tak sedar akan ese lobih pontingkan dio. Tapi bilo sesetengah situasi itu, terpakso juo ese pentingkan kawan.

Kerano itu ese meletakkan tempat ke-2 dan ke-3 dalam hidup ese adalah saling bertukar-tukar antara kawan dan si dio. Ianya saling berkepentingan mengikut situasi semaso. Tetapi secaro keseluruhannyo, sudah tentu si dio lobih ponting. Kerano si dio lah nanti akan bakal menjadi penoman idup ese. Oh ya, kedudukan yang ketama sudah tontu la keluargo ese.

Ese, masih ghaso bersalah. Tapi cumo ese harap dio paham. Paham akan situasi semaso dan dapat membezokan mano lobih ponting pada satu-satu saat itu. Dan, jangan pendam apo di ghaso. Kono la gitau saat tu jugo baru orang lain dapat tau apa yang di ghaso. Kalau sakit katokan sakit, kalu teghaso ati katokan teghaso, kalu pedih kato pedih, kalu geram katokan geram pado saat itu jugo.

Belajarlah meluahkan dari memendam ghaso.