1001 MaLaM

Dolu, 6 tahun nan lalu. Waktu kojo dongan orang.
Memang maso banyok terikat dek waktu kojo.
Walaupun bebas nak masuk kojo pukol berapo, nak poie mano.
Tapi bukan sewenangnyo bulih cuti sesuko ati.
Memang terikat.

Bilo dah kojo sendiri ni. Waktu kojo pun fleksibel.
Ado kojo waktu sibuk, maso banyak digunokan untuk buek kojo.
Time kojo takdo, banyak dok melepak yo.
Tapi kato orang. Nak berjayo, tak bulih biarkan maso berlalu gitu yo.
Kono jugak isikan ruang maso tu dongan bondo yang boleh datangkan pendapatan.
Tak kiro la poie carik client kor, poie jalinkan hubungan duo halo dongan supplier kor.
Yang ponting bukan duduk sajo-sajo melepak kek kedai kopi.

Tapi prinsip ese mudoh yo.
Bilo kojo sendiri. Ese takmau bobankan otak ni untuk fikirkan berat-berat.
Kalau kayo tapi idup stress pun takdo guno jugak.
Biar hidup sederhano, asalkan tidak tertokan dongan ruang lingkup kojo.
Kadang tengok orang kayo, duit berkopok-kopok.
Tapi aih, nak ado maso dongan family pun susah.
Nak pulak bilo dah kayo, nak pandang orang bawah pun dah malas.
Nauzubillah lah. Mintak dijauhkan.

Biar idup sederhano. Bulih duduk samo rato lepak kedai kopi dongan orang marhaen.
Ado maso poie beriadah dongan orang kebanyakan.
Bukan memilih main golf dongan orang kayo yo.
Ataupun poie melancong kek luar negaro dongan orang yang berkepentingan yo.
Naik kereto bosar pun kalau hari-hari idup di maki.
Takdo guno jugak.

Lobih sonang laie idup sederhano. Cukup makan pakai minum segalo.
Sihat tubuh badan. Dan idup tidak lah menanggung stress akibat dari hutang.
Ataupun permasalahan tompek kojo.
Selamat juo lah nak buek amal kebajikan pun.