1001 MaLaM

Bila disuruh buek itu dan ini, kono la buek. Ponat atau tidak, malas atau rajin sekalipun totap kono buek juo. Dah itu memang kojo ekau.. nak buek camno jang. Kono la ekau terimo akan hakikat yang ekau tuh adolah pekorjo dan bekorjo dongan boss. Jadi ikut ajo la apo kato boss ekau tuh jang. Karang ekau tak buek apo dio suruh.. karang ekau juo kono dibuang kojo. Merano la ekau jang.
Tak dapek omak nak nolong eh...

Gaji ekau sikit bonar bukan saloh orang lain jang.. salah ekau juo. Sapo suruh ekau tak cakap dokek boss ekau tu. Itu pun nasib baik di boienyo ekau gaji. Kot nyo buek lomau dan lambat boie gaji dokek ekau laie la merano badan tu ah. Seb baik la jugo boss ekau tuh jonis baik orangnyo.. takdo nak marah-marah dokek staff. Kot nyo ekau dapek yang boss jenis suko marah-marah tak menontu..mau mati ekau jang.
Tak dapek eh omak nak nolong...

Tu la jang.. dolu omak suruh ekau belajo rajin-rajin..ekau malas. Ekau kuat tido pastu ekau poie ponteng kolas tu. Poie main snooker ekau rajin bonar plak jang.. main bowling ekau memang nombor satu jang.. tp bab belaja ni ah yang ekau corot sekali. Omak dah posan berbuih mulut ni ah tp ekau buek pokak ajo telingo. Hah..sekarang baru ekau nak sosal..dah takdo guno dah jang oiii.. Sosal dolu pendapatan.. sosal kemudian takdo guno.
Udah omak nolong eh dolu-doluan...

Orang lain gaji bosar.. ekau gaji kocik. hah..memang padan dongan kelulusan ekau. Tu la jang.. omak dah kato dolu sambung la belaja tapi ekau malas. Ekau kato kojo jo la cari pengalaman. Ni ah.. dah berapo bulan dah ekau kojo..gaji ekau takat tu ajo jang. Orang baru masuk kojo dokek tompek ekau... boleh ajo terus naik gaji tinggi-tinggi berkali gando dari ekau ah. Uih jang.. omak harap ekau sabar ajo la jang. Nak buek camno jang... dah orang baru masuk kojo tu semuo pandai-pandai.. semuo ado degree... tp ekau apo la ado jang. Nasib la badan ekau jang....

Tuh la omak dok harap sangat.. jangan la ekau dok pandang ke atas selalu.. karang hati ekau tidak keruan. Pandang ke bawah dalam hal macam ni jangg... baru la ekau dapat meraso anugerah Tuhan tu.. baru ekau mampu bersyukur dongan apo yang ekau dapek sekarang ni jangg. Kot ekau nak banding-banding pun... banding la dongan yang setaraf dongan ekau. Karang dok banding yang lobih tinggi dari ekau, cemburu dan dongki plak torbit dari hati ekau tu jang.. tu yang omak tak mau tu jang. Sabar ajo la jang..Insya Allah, ado la tu rezoki ekau sikit maso laie kalu eko sabar. Tuhan tolong orang yang tabah dan penyabar.
Ingat posan omak ni janggg..




Pepatah Melayu : Susu di dada tidak dapat di elakkan.
Ertinya : Nasib yang telah tertentu bagi seseorang itu tidak boleh hendak dielakkan, samada baik ataupun buruk.