1001 MaLaM

Kat mano ekorang sambut Merdeka? mungkin mereko di KL akan sambut di KLCC, mereko di Kuantan lak akan sambut di Dataran Bandaraya Kuantan.. dan mungkin juo mereko yang di JB akan sambut di Dataran Bandaraya JB or Danga Bay...dan mereko dokek nogori lain akan sambut di tompek mereko.. tp ado juo mereko yang sambut Merdeka dokek dalam panggung wayang melayan cerito Alien Vs Predetor takpun cerito melayu yang ampeh Aku No. 1... atau ada yang memilih untuk melihat citer penyiasatan Collateral.

Dan ramai jugak yang sambut Merdeka dokek umah melayan t.v atau yang sambut dokek kodai makan bersamo toman2.. ado lagik sadis adolah mereko yang langsung tak amik tau amendo itu sambutan hari merdeka.. dan yang paling menyayatkan hati negaro yang Merdeka ini adalah ado juo ketiko sambutan Merdeka ini.. ado golongan di bawah jambatan melayan ketagihan mereko dan ado anak-anak Merdeko yang sesonang ati menolan air buih yang memabukkan.

Yer.. kerano mereko raso mereko sudah merdeko.. mako mereko leh wat apo sajo yang mereko mahu buat.. Mereko raso Malaysia milik mereko.. dan mereko ingin jadik sebetul2nyo Anak Merdeka yang 'merdeko'... tak perlu laie idop seperti zaman sebelum Merdeka yang kolot, yang tidak ada kemajuan.. itu kato mereko. Jadik mereko ingin maju.. ingin berfikiran terbuko yang kalu bleh bukan ajo fikiran terbuko tp mahu membuko semuo bendo di badan yang bleh dibuko..
Mereko mahu dilihat dan di banggokan yang mereko adolah anak merdeko yang leh wat apo sajo kerano mereko sudah merdeko..

Tp sayangnyo mereko silap.. mereko bukan di negaro bersalji.. mereko bukan di negaro matahari terbit.. tp mereko di negaro yang beriklim khatulistiwa.. di negaro yang mempunyai raja-raja berpelembagaan, di negaro yang mempunyai rukun yang lima itu, di negaro yang makanan rujinyo adalah dari 'pokok yang makin berisi makin menunduk'.. jugo di negaro yang mengamalkan seribu macam adat dan resam.

Malangnyo mereko ingin jadikan negaro ini seperti negaro bersalji.. mengamalkan caro idop seperti seolah mereko berado di sano.. bebas berbuat apo sajo mengikut budayo orang2 sano.. tanpo sodar sedikit pun yang mereko adalah dari bangso yang dolunyo ponah ditindas dan dijajah oleh mereko2 dari negaro sano.. oleh puak yg sentiaso memandang puak lain hanyo sebosar kutu ajo.. anytime bleh tindas dan penyek sampai kuar taik..

Udah la.. eden malas nak merapu berkepunden laie.. lari dari topik asal dah.. sebonarnyo den nak bitau yang den poie sambut Merdeko dokek Danga Bay, Johor Bharu. Humang aih.. ramai tak ingat dunio eh manusio dokek sano.. skit punyo susah nak parking. Den parking jauh gak.. dokek Restoren Singgah Selalu, sbb budget lepas countdown nanti nak poie makan dokek situ lak.. Haa.. actually.. tujuan utamo den poie sano sebonarnyo adolah den nak nengok bungo api.. Bungo-bungo Api..

Samo seperti sambutan Tahun Baru dolu.. bungo api di pasang dokek atas tongkang di tongah laut.. Tak tau la berapo budget pihak gomen buek sumo tuh.. tp yang pasti dokek beriban2 juo la.. kan baguih duit tuh buek bagik dokek wargo-wargo tuo takpun dokek orang miskin di ulu2 Johor nih.. tp nak wat camno.. bab kemeriahan dan bersuko rio nih takyah nak halang dan kritik gomen la.. sbb mmg gomen suko sangat berhabis utk hiburan dan kemeriahan apo sajo nih.. itu semuo rakyat mesia dah tau dah.

Dokek sini den kongsikan skit la pic bungo-bungo api buek tatapan mereko yang sambut dokek umah.. dokek pawagam dan dokek bawah jambatan dan jugok dokek dalam bilik otel.. sobab mereko mano sompek nak nengok bungo api nih.. byk laie di SINI..



Bungo-bungo api malam Kemerdekaan Mesia ke 47.