1001 MaLaM

Naik mesin maso.

Dolu-dolu. 7 tahun lopeh.
TIMECel milik Time Wireless Sdn Bhd.
Pernah menagih hutang dari ese.
Tak sikit tak banyak.
Lobih kurang seribu empat ratus plus-plus.

Ni garo-garo silap paham.
Dolu member yang pakai pra-bayar. ADAM.
Dapat ber-sms percumo.
Ese yang pakai pasca-bayar, ingatkan percumo jugak.
Bantai sms sampai lupo dunio.
Member-member pun pinjam buek sms samo.

Sekali. Bil dah sampai.
Humang aih. Tekojut boruk ese.

Dah la poket kering.
Apo laie. Menagih simpati omak ayah dokek kampong.
Dokek duo tigo bulan jugak lah nak selosai hutang ese dongan Timecel.
Itu pun sampai duo tigo kali jugak surat dari Saleem Gill & Partner sampai.

Keluar dari mesin maso.

Ese belek surat-surat lamo dalam laci.
Nak komeh nak buang mano yang tak berguno laie.
Ese terjumpo satu bil beli handphone paling canggih maso tu.
Nokia takdo antenna. Nokia 3210.
Maso tu kalu handphone rego seriban lobih. Kiro mahal lah tu.
Separuh duit loan abih buek boli handphone tu.

Dan maso boli handphone tu lah ese daftar pasca-bayar Timecel.
Nombornyo 017-7785472.

Ese cubo dial.
Eh, eh. Ado nada lah. Ese lotak semula.
1 minit kendian.

Tit. tit.
"Sape ni?" , sms dari nombor lamo ese tadi.

Ketek-ketek-ketek..
"Ayares here, sorry.. i terdial nombor lamo i tadi. Ingatkan takdo orang pakai."

Tit..tit..
"Laki ke pempuan ni" , kalu tanyo soklan camni, biasonyo musti laki kat sebolah sano.

Ketek-ketek...
"Laki, and u..what ur name?" ese sajo nak tengok.

Seminit, duo minit, sejam, duo jam..

Takdo orang balas dah sms last ese tadi.
Sah. Nombor tu sekarang lelaki yang pakai.
Moga dio tak terkono kenan ese.
Dan tak pakai talian tu sampai riban-riban.

p/s :
wahai pemilik nombor di atas sekarang. sekironyo anda pempuan.
Sila sms ese kembali.
Moga-moga dapat ese mengorat anda.