1001 MaLaM

Sebuah majalah hiburan tompatan nampaknyo dikelek si ahmoi. Dilotakkan ataih mejo lalu den amik dan belek-belek. Den geleng kepalo, ahmoi dah paham yang den memang tak suko beliau membazir untuk majalah sio-sio itu. Teruih ahmoi cakap.. "bukan beli... pinjam dari kawan". Den senyum tawar ajo disambut cebikan ahmoi.

Dari satu muko ke muko lain den belek, den kiro dan kiro. Kendian den nengok muko dopan, carik nilai akan sebuah majalah itu. Owh..murah ajo, patut la nipis semacam jo. Tapi, hargonyo agak tinggi bagi majalah yang hanyo ado 30% informasi, selebihnyo adolah iklan. Paling banyak iklan handphone ringtones dan logo. Den tanyo ahmoi... "ni majalah hiburan ke majalah iklan?" Ahmoi jeling tando protes pernyataan den.

Kalu buek peratusan dalam majalah tuh, den boleh cakap gini.. 30% adolah informasi tontang dunio hiburan tanoh air dan luar negaro, 20% adalah gambar dan poster artis dan 50% laie tuh adolah iklan-iklan. Nampaknyo penerbit majalah mengaut keuntungan dongan memuatkan iklan daripado memuatkan informasi hiburan. Sobab tuh dah jolaih dan nyato dunio hiburan membawo kepado kerugian kepado masyarakat kecuali syarikat rakaman dan syarikat penerbitan hiburan.

Tukar la namo majalah kepado "Majalah Buriklan" [ majalah hiburan dan iklan ].



Pepatah Melayu : Berhambakan tangan, bersaksikan mata, berhukumkan hati.
Ertinya : Sebelum buat sesuatu, fikirkan dulu baik-baik supaya jangan menyesal di kemudian nanti.