1001 MaLaM

Dulu jolokan Dr. Love sering bermain di telingo ese.
Ah. Zaman remajo. Bilo di ingatkan. Goli eh telingo ese.
Zaman bermain dongan madah pujanggo.
Eiiiyeeewww.

Malas sebonanyo eh nak nulih jiwang-jiwang.
Macam sesetongah blog yang ado dokek dunio maya ni.
Muak dan memualkan. Sadis.
Tapi sekali sekalo tulih. Bulih bikin panas.

Kalau suko tapi tak cinto.
Tetap tidak bulih bersamo.
Kalu cinto tapi tak suko.
Pasti ado masalah melando.

Sayang?
Bukankah manusia harus saling sayang menyayangi.
Tapi istilah sayang ini luas sekali skopnyo.
Ado yang sayang disulami cinto.
Ado yang sayang disulami suko.
Ado yang sayang disulami duko.

Ese? Tidak ponah membenci sesiapo.
Walaupun musuh sekalipun.
Walaupun ekau ponah lukokan hati ese.
Walaupun ekau ponah robek dan jatuhkan maruah ese.

Bagi ese.
Sayang itu harus kekal wujud.
Hinggo jasad ese terbujur kaku.
Dan ese mohon, saat jasad ese jugak terbujur kelak.
Mogo manusia yang hidup. Totap menyayangi ese.
Walaupun duko yang kalian tempuhi.
Sepanjang mengonali ese.

Tanpo ghaso sayang. Manusio berporang satu samo lain.
Manusio sanggup membunuh makhluk tak berdosa.
Hilangnyo ghaso sayang. Manusia mulo membenci.
Walaupun doluan ponah ado selaut kasih.
Walaupun doluan ponah ado segunung harapan.
Benci bakal meranapkan segalonyo.

Sayang. Suko. Cinto.
Harus sering ado dalam jiwo manusio.
Kongsilah ghaso sekelumit itu.
Dongan manusio sekalian alam.
Akhirnyo dunio akan aman makmur bahgio.