1001 MaLaM

Rutin menyambut Aidilfitri.
Sojak dari ese mulo konal dunio, memang dokek kampong ni yo ese beghayo.
Bangun pagi-pagi bersiap pakai ensem-ensem. Dari dolu laie.
Sebolom poie mano-mano, mintak ampun dokek mama dongan ayah.

Lopeh tu poie masjid dokek yo dongan umah.
Dokek masjid lopeh semayang ghayo biaso ado juadah.
Jamah sikit sambil borak dongan orang kampong.
Dah lamo tak jupo la katakan.
Ado yang merantau macam ese ni sekali sekalo yo dapek jupo.

Dari masjid tu terus yo poie umah nenek. Dokek yo dongan umah ese.
Berkumpul sedaro maro dokek situ.
Dokek situ lah bermaafan seluruh ahli keluargo.
Makan-makan dolu dan bergambar suko-suko.
Dokek situ jugaklah kalu dolu zaman ese kocik.
Paling best saat menunggu duit ghayo.
Beratur ramai-ramai nak dapekkan duit ghayo dari atok.

Tahun ini, sojak ese bekojo ni.
Dan anok sedaro pun dah ramai.
Jadi ese pulak lah yang kono boie dorang duit ghayo.
Suko bebonar dorang dapek sampul ghayo.
Lopeh dah makan, duit ghayo dah boie.
Dah abis bermaafan. Kitorang ramai-ramai akan bergorak poie beghayo.

Destinasi pertamo umah atok sedaro bolah nenek.
Atok sedaro dah takdo. Yang ado sedaro maro yo.
Dokek situ ado banyak rumah sedaro maro.
Tak jauh pun dari umah nenek ese tadi.
Satu kampong yo semuo sedaro maro ese.
Dokek situ jugak lah umah bos ese.
Dari satu rumah ke satu rumah dah biaso poie beghayo.

Dah habis dokek satu kelompok sedaro maro.
Kitorang akan bergorak ke kelompok sedaro yang lain.
Kali ni ke umah atok sedaro bolah atok pulak.
Yang ni dokek kampong sebolah yo.

Dah habis beghayo umah sedaro.
Waktu pulang duduk umah menyambut tamu.
Sampailah ke potang melayan tamu datang.

Ghayo keduo pulak rutin seperti biaso.
Pagi-pagi poie ke kubur. Memang sedaro maro ese pakat poie pado ghayo keduo.
Menziarahi kubur arwah ayah, atok bolah ayah dan sedaro maro.
Moyang ese pun dokek kubur yang samo.
Biasonyo atok lah yang mengepalai tahlil dokek kubur.

Dan hari-hari lain biasonyo ese akan duduk umah melayan tamu.