1001 MaLaM

Betol jugak ado pepatah.
Hidup Ibarat Roda.
Kadang di bawah, kadang di atas.

Akak yang meniago air.
Dalam balang plastik.
Dan jual kuih serta nasi bungkus.
Dokek perhentian bas tepi jalan bosar.
Yang sibuk itu.
Macam ese konal.

Ghasonyo dolu.
Punyo sebuah restoran.
Berhadapan dongan sebuah bank.
Sebaris dongan Capturepixs Studio.

Kalu dolu, ese suko jugak sarapan dokek restoran tu.
Ado makan kuih. Ado makan roti canai.
Dan terkadang bilo ese bayar.
Ado baki syiling lobih, ese tak ambil.
Dan kadang-kadang pulak,
Akak tu tak konokan bayaran.
Katonyo dio belanjo ese.
Sobab dah banyak kali ese tak amik baki duit syiling.

Sedih jugak ese lihat.
Bilo dio kini meniago di hentian bas.
Dibawah satu payung bosar.
Dongan duo bijik mejo.
Di tomani anok dio yang montel.
Tetapi garang yang amat.
Bilo ese cubo bergurau.

Kalau nak kato restoran dio dolu tak maju.
Ese tengok pagi-pagi ramai jugak orang datang.
Kalu tongahari pun ado orang makan.
Cumo bilo waktu malam. Takdo orang.
Sobab restoran tu dokek kawasan simpang.
Dan kurang menarik untuk makan malam.

Sekarang. Dah jadi restoran mamak pulak.
Pun tampak macam laie kurang orang.
Apatah laie waktu pagi. Yang ado hanyo roti canai.
Lain-lain macam biaso lah, kari masakan mamak.
Dan sekarang, ese dah tak sarapan kat situ laie.